Sentro di Konosementu

Fundashon Históriko Kultural Boneriano, FuHiKuBo
Fundashon Históriko Kultural Boneriano, FuHiKuBo
E fundashon pa historia i kultura di Boneiru, fundá 6 di ougùstùs 1998, tin komo meta promoshon di dokumentashon di historia di Boneiru i ta purba logra esaki ku:
a. Dokumentashon di historia pa medio di kolekshoná obra históriko tokante Boneiru, archivo di famia i otro archivo, transkribí grabashon, filmashon i grabashon di historia oral i músika folklóriko pa sentralisá nan den ún archivo;
b. Revisá i studia fuentenan históriko, hasi grabashon di músika, skirbi buki i revista i publikashon di esakinan;
c. Mantené kontakto ku institutonan sientífiko i sientífiko

E fundashon ta aktivo den tur área importante di e Konvenshon di Patrimonio Kultural Intangibel - Intangibel Cultural Heritage ICH di Unesco di 2003, i ta ehersé aktividatnan di salbaguardiá manera: identifikashon, dokumentashon, investigashon (inkluso inventarisashon); mantenshon, protekshon; promoshon, fortifikashon, traspaso, enseñansa formal i informal i revitalisashon.

Aktividatnan
Promé ku na 2012 Hulanda a ratifiká e Konvenshon di ICH di UNESCO di 2003 ya for di 1990 FUHIKUBO ta aktivo ku grabashon di video di hende grandi di Boneiru i nan storianan ku tin di ber ku patrimonio, kultura i naturalesa di Boneiru. E archivo di FUHIKUBO ta konta ku mas di 2000 entrevista grabá i hopi dokumental i programa spesial tokante un variedat di tópiko riba tereno di patrimonio kultural intangibel. E tesoro enorme akí na informashon ta disponibel gratuitamente pa públiko grandi via www.archivoboneiru.com For di 2017 tin tambe un kanal di televishon spesial, Bonaire.tv. Na e kanal akí 24 ora pa dia ta transmití dokumental i entrevista. Por mira e programanan tambe na Aruba, Kòrsou, St. Maarten i na Hulanda via YouTube i Vimeo. Mayoria ta na papiamentu, pero tin hopi programa tambe na ingles i hulandes.

Kategoria di programanan na #entrega & kantidat
Boneiru Ayera i Awe: 460
Dokumental: 70
Herensia: 1385
Herensia di Siglo: 85
Aki Boneiru: 446 (1981- )
Aktualidat: 38 (oug 2021- )
Beku (programa radial semanal): ±1000 (2007- )
Despues ku Hulanda a ratifiká e konvenshon ofisialmente, FUHIKUBO a sigui hunga un ròl importante den ehekushon lokal di e konvenshon. Direktor Franklin Antoin for di 2014 ta miembro di Grupo di Trabou di UNESCO Boneiru i a asistí na tur seshon di e Proyekto di Desaroyo di Kapasidat di e Konvenshon di ICH di 2003. Di 2014-2018 Hulanda a spònser e proyekto akí pa Aruba, Boneiru, Kòrsou, i St. Maarten, St. Eustatius, Saba i Sürnam.
Durante añanan ku a pasa, FUHIKUBO a amplia su área di trabou i ta dokumentá historia oral na e otro islanan di e Antia Hulandes anterior. Ta archivá e programanan akí i ta pasa nan na stashonnan di televishon lokal i na Hulanda.

Franklin Dominico Antoin ta fundadó i direktor di FUHIKUBO. E tin un interes grandi den historia, kultura i naturalesa. Antoin ta periodista na e korant lokal Extra for di 1977. Durante su karera el a editá míles di artíkulo, storia i seri, i grabashonnan transkribí den artíkulo ku ta sali den e korant Extra.
Antoin pues a promové uso di papiamentu komo medio pa traspasá konosementu. Tambe el a publiká hopi buki tokante susesonan históriko, susesonan spesial i komunidatnan na Boneiru. Antoin huntu ku otro miembronan di direktiva di Fuhikubo ta organisá vários kurso. E ta un kanadó ferviente i den kurso di añanan a organisá hopi kaminata rònt Boneiru. Via e grupo Chantiwawa awor, su eks kursistanan regularmente ta organisá kaminata.

Kompetensia i ekspertisio
Mas ku kuarenta aña, e organisashon a akumulá eksperensia práktiko riba tereno di investigashon, dokumentashon, mantenshon i traspaso di historia kultural intangibel. E fundashon ta kompartí e konosementu ku e tin i ta sirbi komo ehèmpel pa otro.
FUHIKUBO tin un kordinador partaim den servisio, i un kamarógrafo/editor. E otro trahadó regular, di spònser pa Bonaire Communication Services, ta digitalisá, upload i manehá e material di oudio i oudiovisual i aparatura di FUHIKUBO. E organisashon ta traha ku boluntario i stazjèr. Ta kontratá kamarógrafo èkstra pa proyekto spesífiko, i ta supkontratá pa transkripshon di grabashonnan di dokumental. Antoin i su otro miembronan di direktiva ta organisá diferente kurso i entrenamentu.

FUHIKUBO tin un grupo núkleo di 15 boluntario. Algun biaha nan a haña entrenamentu den koperashon ku e Proyekto di Desaroyo di Kapasidat di ICH di UNESCO. Ta bai pa dokumentashon di historia oral pa medio di investigashon kualitativo, téknika di entrevista, time-coding, editá, investigashon kuantitativo, digitalisashon i archivá. E grupo di entrevista a traha vários dokumental tokante festivalnan manera di simadan, barí i San Juan i San Pedro, Maskarada, kuranderia, i desaster natural.
E traspaso di abilidat pa traha dokumental ta basá riba eksperensia amplio ku FUHIKUBO tin ku dokumentalnan tokante tradishon, tradishon sosial, fishinan traditional i historia oral.

Eksperensia ku koperashon ku komunidat, grupo i praktikantenan di ICH
FUHIKUBO su eksperensia amplio ku koperashon ku individuonan i komunidatnan lokal riba tereno di patrimonio kultural intangibel, a dun’é un bon reputashon. Aktivamente ta hasi un apelashon riba su servisionan pa entrevistá hende grandi, i artista. E fundashon a krese i a desaroyá su mes pa un institushon ku un archivo digital i di papel impreshonante. FUHIKUBO diariamente ta risibí foto di famia, dokumento i otro kos pa warda. Manera diskunan fonográfiko 45, 33 i 78; grabashon di músika, material oudiovisual, buki i opheto. Tin un grupo di boluntario ku ta traha spesialmente ku selektá, deskribí i digitalisá foto. FUHIKUBO tin míles di foto. Un otro grupo ku parsialmente ta konsistí di empleadonan di banko ku ta hasi trabou pa komunidat, ta entrená pa hasi kaminata den naturalisa rònt Boneiru. E grupo ta organisá tambe charla informativo/edukativo tokante historio, kultura i naturalesa. I ta registrá tambe buki, revista i manuskripto den FUHIKUBO su biblioteka físiko. Studiante, dosente i hendenan di tur sektor di komunidat ta bishitá e biblioteka regularmente.

Koperashon: FUHIKUBO ta traha huntu ku e.o. Mangazina di Rei, Terramar, Fundashon Arte i Kultura i Plataforma Kultural na Boneiru, Regionaal archief Dordrecht na Hulanda i NAAM na Kòrsou.

Kurso: FUHIKUBO a duna kurso di skirbimentu na papiamentu. Na fin di e kurso a publiká un korant, ESUN, ku a repartí na eskala grandi. Ta duna kurso di investigashon na dosentenan ku ta hasi uso di archivo di FUHIKUBO, kursonan di historia na poblashon i hendenan ku ta bin biba na Boneiru. Henter aña ta duna kurso tokante historia di Boneiru na papiamentu, hulandes i ingles.

Programa di radio: For di 1985, promé komo Radiotopiko i desde 2007 komo ‘BEKU’, ta transmití e programa di radio semanal di dos ora via Voz di Boneiru 94.7FM. BEKU ta ofresé un plataforma na henter komunidat pa trese dilanti, diskutí i interkambia asuntunan tokante kultura lokal i e komunidat dinámiko ku nan ta biba den. Ta live stream, graba i por mira tur programa riba facebook.

Wèpsait, medio sosial, televishon: E archivo digital di FUHIKUBO a yega awor na mas o ménos 45 TB ku informashon oudiovisual, visual i di data. Henter e archivo ta aksesibel pa hendenan tur parti di mundu. Regularmente ta upload material nobo via archivoboneiru.com, e wèpsait di FUHIKUBO su archivo digital. FUHIKUBO, BONAIRE.TV i BEKU nan kada unu tin un página di Facebook i un lenk di YouTube i Vimeo kaminda hendenan na i pafó di Boneiru por sigui programanan bibu di radio i televishon.

Informashon di kontakto:
FuHiKuBo
Kaya Irlandia 12
Bonaire, C.N.
Tel: +5997178482
Emailadres: b.antoin.extra@gmail.com & fuhikubo@gmail.com