Terenonan di kunuku i kas na Boneiru a konosé diferente forma pa sera nan. Tabatin entre otro kurá di piedra, trankera di yatu i di rama. E forma di sera kunuku òf tereno di kas ku yatu ta konosí komo ‘kose trankera’, un trabou hopi spesialisá. Ántes, promé ku e waya konosí komo ‘kabrietengaas’ a yega Boneiru, tabata pone yatu meimei di palu di kuku ku tabata poné horizontalmente.

Tambe sa usa dos kabel ku tabata span meimei di e stakanan. Den esakinan tabata hinka yatu. Despues ku a introdusí ‘kabrietengaas’ a kuminsá krusa òf kose yatu meimei di e waya. Un hèrmènt indispensabel den kosementu di trankera di yatu ta ‘chi ku cha’, un horketa i un hak di palu, ku ta usa pa kue yatu. ‘Chi’ ta e horketa i ‘cha’ ta e hak. Mayoria bes ta traha ‘chi ku cha’ di palu di kuida òf kui.