Pa promé biaha por a mira Nikiboko riba un mapa na 1825 komo Nokoboki. Nikiboko tabata ainda un pueblo kaminda habitantenan tabata gana nan pan komo nabegante i piskadó, pero tambe komo kunukero. Lac i Sorobon tabata e lugánan kaminda e piskadónan tabata bai piska den e bahia mes òf riba laman ganchu. Tabata un pueblo ku tabata selebrá Simadan, Barí, San Juan i San Pedro i tambe maskarada. Di e selebrashonnan akí ainda regularmente tin esnan di San Juan i San Pedro.