A funda Antriol na 1626 tempu ku a deportá un grupo di spañó i portugues pa Boneiru i nan a bai biba ‘al interior’. ‘Al interior’ a bira despues Entrejol i mas despues Antriol, kaminda mas hende a bai biba, p.e. famianan di hendenan ku a haña nan libertat i ku a haña òrdu pa na 1850 bandoná Rincon. Riba mapanan bieu i dokumentonan di gobièrnu ta mira tambe e nòmber Den Tera. E komunidat na Antriol tabata biba di kunuku den besindario, pero tambe di kunukunan na Tras di Montaña. Vários habitante di e bario tabata traha den plantashi kaminda tabatin mester di trahadó. E bida di laman a dirigí su mes den e área na Lagun i bahia di Playa. Tambe komo nabegante, habitantenan di Antriol a purba gana nan pan. Vários hende hòmber a bai traha temporalmente den eksterior (Cuba i Venezuela). Antriol ta un bario ku te añanan 70 di siglo 20 tabata selebrá Simadan, San Juan i San Pedro.