Maskarada

Maskarada ta un selebrashon ku a mantené su mes bibu na Boneiru, anke ku na sierto momentu den tempu, el a menasá di bai pèrdí. Ta selebrá e fiesta aki dia 1 di yanüari. Segun tradishon e grupo di maskarada promé ta bai na kas di gezaghebber, despues ta bishitá kasnan den bario. Tin un muzik spesial di maskarada, den kua sinfonia i tambú di dos banda òf tambor ta instrumèntnan ku mester ta den e muzik aki. E maskanan (miembronan di e grupo) ta presentá tambe algun skèch, manera toriamentu di baka i piskamentu.