‘La Basílica de Nuestra Señora del Valle’ ta un basílika gótiko ku ta keda na El Valle del Espíritu Santo ku ta un pueblo di Isla de Margarita, na estado Nueva Esparta, na nortwèst di Venezuela. Su nòmber ta na honor di patrona di e pueblo i armada venesolano: la Virgen del Valle. Fuente: Wikipedia

Bonaire tin un flota di boto piskadó, i tin famia di piskadó ku tradishon ta pasa di generashon pa generashon. Hopi di e famianan ei tin nan orígen na Isla Margarita na Venezuela, i for di ei nan a trese tradishonnan di piskamentu Boneiru. Piskadónan di Boneiru ta sali dia den dia ‘fo, for di mardugá i ta piska henter dia. Nan ta regresá fin di atardi i limpia loke nan a kohe. Despues nan ta hiba esakinan restorant òf ta bende esakinan for di nan propio kas òf tienda chikitu. Ta konsiderá e laman parti pariba di Boneiru ku kondishonnan di oséano kompleto, i hopi biaha, ku ola i koriente fuerte ku ta pone boto pasa den skual. Aunke poko biaha, tin biaha boto por haña problema riba laman, i e ora ei henter Boneiru ta uni pa yuda trese e piskadónan den problema kas.

E hòmbernan di laman akí ta hasi e trabou akí, no solamente pa mantené nan famia, sino simplemente pasobra esaki ta loke nan ta hasi.
Un di e tradishonnan ku a yega Boneiru for di Isla Margarita ta e bendishon anual di e flota di piskadó. Patrona di piskadó ta La Virgen del Valle. Dia di e santu akí ta 8 di sèptèmber, i kada aña, un fin di siman pegá ku e fecha akí, e komunidat di piskadó di Boneiru ta reuní pa pidié seguridat pa su botonan i piskadónan pa e siguiente aña.
Pa e seremonia spesial akí, botonan piskadó di tur tamaño, forma i koló ta reuní na e waf di piskadó na Sorobon. Aki ta pone e Vírgen riba e boto ku ta enkabesá un desfile den e bahia di Lac. Na esaki tur boto ta rindi homenahe na Vírgen del Valle pasando rònt di su boto, promé ku regresá waf.

Ora regresá tera, tur hende ta reuní riba playa pa un selebrashon di misa, ku ta inkluí bendishon di boto i piskadó. Despues ta sigui un enkuentro sosial chikitu i, ora solo skonde tras di horizonte, Boneiru su flota di boto piskadó ta sano i salvo te e siguiente dia mainta.

(Fuente: Bonaire Insider Reporter, Susan Davis, 14 di sèptèmber, 2015)