Aparte di Maskarada, den e temporada di fin di aña, Boneiru ta konosí pa su tokamentu di barí. Den tur bario, ku eksepshon di Playa, tabatin tokamentu di barí. Tantu na Rincon, Nort di Saliña, Antriòl, Nikiboko komo Tera Kòrá, tabatinsitionan spesial kaminda tabata organisá e fiestanan aki, leu for di bista di outoridatnan polisial i pastor. For di òktober kaba kueru tabata kuminsá zona, pa despues kulminá den temporada di fin di aña. Prinsipalmente bispu di Pasku i bispu di Aña Nobo barí tabata zona mas tantu. E lugá sigur konsiderá komo e sentro di tokamentu di barí ántes tabata Piedra Pretu, pegá ku e sitio na unda despues a konstruí Misa Evangelista (Alians Evangélika).

Tabata na Piedra Pretu ku hendenan di Rincon, tantu hòmber komo muhé, tabata bini huntu pa toka, kanta i balia. Otronan tabata keda para den skuridat na un distansia pa sigui e evento popular akí, debi na miedu ku nan presensia na barí lo por a hasi daño na nan reputashon den sosiedat Pastornan tabata konsiderá tokamentu di barí komo algu di diabel i di ningun manera no tabata haña esaki aseptabel den nan parokia. Originalmente e instrumentonan usá den tokamentu di barí tabata, aparte di e barí of tambu mes, wiri, triangel i chapi.

Mas despues otro instrumento a penetrá. E barí mes tabata bini for di eksterior ku sierto produkto aden. Riba dje tabata rèk un kueru di karné kurtí, ku tabata mihó ku kueru di kabritu. Kueru di karné ta mas fleksibel. Ku kalki di fruta di watapana tabata prepará e kueru, pa despues usa rais di pal'i kui i klabu di rei pa peg'é riba e barí. Tiramentu di puña tabata un dje ingredientenan básiko den e fiesta di barí. Si por ehèmpel un mucha muhé, sigur si e tabata di bon famia, sali na estado, tabata kant'é na barí.Banda di tokamentu di bari, tabatin tambe batimentu di mesa. Enbes di usa un barí, pa saka muzik, nan tabata bati riba un mesa. E tabata djis un forma pa evitá ku polis por a aktua. Tokamentu di barí tabata prohibí; batimentu di mesa nò! Tambe sa usa e nòmber ‘baile di señorita’ pa batimentu di mesa, pasobra ei si hendenan mas desente, entre otro señoritanan nèchi, por a akudi sin daña nan reputashon. Den e bario Mexico, parti pariba di Antriòl, nan tabata bati mesa, dunando asina un toke mas desente i legalmente aseptabel na e aktividat aki.