Den tempu di sklabitut, kuido médiko na Boneiru tabata pésimo. Esaki miéntras ku tòg den e tempu ei a yega di registrá diferente epidemia ku a afektá prinsipalmente e katibunan ku tabata traha riba e isla, siendo un plantashi di gobièrnu. Semper sinembargo den e periodo ku Boneiru tabata un plantashi di West Indische Compagnie i despues un plantashi direktamente bou di Gobièrnu di Hulanda, tabatatin un dòkter stashoná riba e isla aki. Nan tabata yam’é ‘chirurgijn’. E tabata alabes trahadó di remedi.

Yerba Medisinal
“E hende di ántes, promé ku e disidi di bai dòkter, tabata trata na usa remedi di kas. Ta trata mayoria biaha di yerba i foyo di palu i mata ku ta krese den naturalesa. Tabatatin diferente spesialista di yerba. E pensamentu general serka e poblashon boneriano tabata ku ‘yerba’ ta kurativo, sino Dios lo no a krea nan.” Paul Brenneker den su buki ‘Yerba’.

Haladó
Banda di buska sanashon den uso di yerba, e boneriano tabatatin tambe su haladónan. Den tur bario bo por a haña e hendenan aki. Tabata tin dos tipo di haladó, esta e haladó di enfermedatnan síkiko, i e haladó di problemanan físiko, manera un brasa òf pia ku a sali fo’i lugá. Tabatin tambe un kombinashon di nan dos.
Mayoria di haladó, e humadónan, ta duna un tratamentu ku ta dura tres dia. Pero si e pashènt no rekuperá, por sigui bai sinku dia, shete dia i asta nuebe dia. E kantidat di dia di tratamentu sinembargo mester ta impar. E no por ta por ehèmpel dos, kuater, seis òf ocho.

Skirbi Kolobrí
Den kuranderia popular na Boneiru nos konosé tambe e kuranderonan di kolibrí (gordelroos) i flamderos (wondroos). Roberto (Bob) Harms, investigadó di kultura i historia, ta splika ku kolibrí ta un infekshon ku bo ta haña di un vírùs ku yama ‘Herpes zoster’ i ta afekta nervio i ta kore largura di e nervio. E ta hopi doloroso. Depende unda e infekshon kuminsa ta skirbi ku un pen punta moli manera un steft riba e kueru pa no kòrta kurpa di hende. Pana Egbrechts ta konta ku ta skirbi Hesus su so, nada kuné. Despues un otro kaminda ta skirbi Hosé i Maria bruá den otro. Rónt di esei ta pone krus pa e infekshon no plama. Mientrastantu ta hasi orashon ku fe den Dios pa e kos aki kura. Pa nuebe dia largu nan tabata hasié, di manera ku nan ta stroba e infekshon di sigui kore.

Kada kurandero tin nan preis. Pero tin tambe ku no ta kobra direktamente, sino ta pidi e pashènt pa duna algu segun su konsenshi. Tin ku no ta risibi plaka den nan man. Nan ta pidi pa pon’é riba un mesa. Otronan, por ehèmpel skirbidó di kolibri ta pidi pa tira e plaka abou.
Awendia tin ainda varios kurandero di generashon nobo ta praktiká na Boneiru ku tin e don i/òf ku a risibí e sabidoria di nan grandinan.