Historia oral ta kolekshon i estudio di informashon históriko tokante individuo, famia, evento importante òf bida di tur dia usando sinta di oudio, sinta di video òf transkripshon di entrevista. E entrevistanan akí ta tuma lugá ku personanan ku a partisipá na òf a opservá eventonan den pasado. Nan rekuerdo- i persepshonnan di eseinan mester preservá komo un registro ouditivo pa generashonnan den futuro. Intenshon di historia oral ta pa optené informashon for di diferente perspektiva. Mayoria di eseinan no por haña den fuentenan skirbí. Historia oral ta referí tambe na e informashon ku a haña di e manera akí i na un obra skirbí (publiká òf no publiká) basá riba e datonan ei, hopi biaha wardá den archivo- i bibliotekanan grandi. E konosimentu presentá pa historia oral ta úniko den e sentido ku e ta kompartí e perspektiva, pensamentu, opinion i komprenshon tásito di e personanan entrevistá den su forma original.

Ta usa e término tin bes den sentido mas general pa referí na kualke informashon tokante eventonan den pasado ku testigunan a konta un otro hende, pero historiadónan profeshonal generalmente ta konsiderá ku esaki ta tradishon oral. Ensiklopedia di Columbia ta splika esaki di e siguiente manera:Durante hopi tempu sosiedatnan primitivo a basa nan mes riba tradishon oral pa preservá un registro di pasado pa falta di historia skirbí. Den e sosiedat oksidental, uso di material oral ta bai bèk na e promé historiadónan griego Herodoto i Tusídides, kendenan a hasi uso amplio di informenan oral di testigu. Allan Nevins i su sosionan na Universidat di Columbia a desaroyá e konsepto moderno di historia oral den e dékada di 1940.

Fuente: Wikipedia

Na Boneiru, Franklin 'Bòi' Antoin ta kolektando historia oral pa kasi kuater dékada di hende grandi na Boneiru i tambe na e otro islanan di e eks Antia Hulandes. Su pashon a pone ku el a krea un fundashon pa historia i kultura di Boneiru: FUHIKUBO. Pa mas informashon tokante e trabou di Antoin i Fuhikubo: https://www.patrimoniokulturalintangibelboneiru.com/sentro-di-konosementu/

Mira e kompilashon di 15 aña di dokumentashon di historia oral na Boneiru di parti di Antoin.