E desaster natural ku a afektá Boneiru mas tantu den historia ta orkan. Te asta tin orkan ku a eksigí bida di hende. Orkan i e temibel bientunan sùitwèst a kousa ademas hopi daño material. Pero otro tipo di desaster natural tambe ta posibel, manera sunami i temblor.

Historia oral
Hende grandinan di Boneiru ta rekordá komo e orkannan mas fuerte ku a pasa riba òf banda di e isla aki Hazel i Janet. Enbèrdat Hazel (1954) i Janet (1955) a kousa hopi konsternashon, tambe daño. Un sistema ku hopi áwaseru, bos i welek ku a bini algun dia despues di Hazel asta a eksigí un bida, esta di Ricardo Winklar, tata di e konosido kantante Nemensio Winklar, den e anochi di 19 di òktober 1954. El a muri kimá den e torno (faro) di Ser’i Bentana den plantashi Washington, na momentu ku un kandela a surgi despues ku welek a dal den e torno aki.
Pero Janet, Hazel, Joan, Bret, Omar, Ivan, Thomas, Lenny i otronan tabata nada kompará ku un orkan ku a pasa riba e isla na 1877 i ku a eksigí 21 bida. E hendenan aki mayoria tabata riba e barkunan ku tabata den bahia di Kralendijk na e momentu ei.

Dokumental
Den kuadro di e investigashon realisá na 2018, bou di ouspisio di UNESCO, a papia ku diferente persona ku a pasa den e mal tempunan inkluso piskadó i kunukero. Tambe a realisá entrevista riba diferente fenómeno natural, ritual i señal i a papia ku instanshanan responsabel pa maneho ora di disaster manera gobièrnu, kapitan di haf, hòspital i otronan. E dokumental aki a bira unu largu di kasi tres ora. E vershon kòrtiku di un ora ku suptítulo na ingles ta aksesibel aki.