Marimba òf marímbula ta un instrumènt musikal hopi usá den gruponan musikal na spesialmente Boneiru i Aruba. Na Kòrsou tambe e tabata konosí, pero despues práktikamente a disparsé. Masoménos na 1930-1935 e instrumènt aki a yega Boneiru. Na Aruba el a drenta masoménos na 1920. Trahadónan di e islanan aki ku a bai traha den kunuku di kaña na Cuba a trese marimba. Na Boneiru tantu e nòmber marimba komo marímbula ta konosí. Ta un instrumènt di orígen afrikano ku via sklabitut a yega Caribe. E ta un kaha di masoménos 4 cm haltu, 32 cm hanchu i 20 cm hundu ku 5 pa 7 lenga di stal ku ta produsí su tononan.