A funda Tera Kòrá, asina yamá pa e tera kòrá ku tin aya, na febrüari 1850 tempu ku gezaghèber Jan Schotborg Claaszoon a duna òrdu na 45 famia pa muda di Rincon pa Mundu Nobo. Despues di un tempu, un grupo di persona esklavisá tambe a muda pa Mundu Nobo, di unda nan por a kana bai Saliña pa traha. E nòmber Mundu Nobo a keda eksistí te na prinsipio di siglo 20, tempu ku el a kambia pa Tera Kòrá. Bida den e bario tabata konsistí di traha den kunuku, biba di laman i traha den saliña. E selebrashonnan di Simadan, Barí, San Juan i San Pedro ta biba ainda, aunke e frekuensia ta bahando.