E bario mas bieu ta Rincon, un pueblo ku spañónan a funda na 1527 tempu ku nan a bolbe trese habitantenan indígeno Boneiru pa biba aki. Nan a trese tambe bestia pa kria na Boneiru, i a funda Rincon kaminda e supervisor a establesé su mes protehá pa seru i e kosta brutu kontra atake di enemigu for di laman. E indígenonan tabata traha komo kriadó di bestia pa nan. Tempu ku a trese hendenan esklavisá Boneiru for di Afrika, a laga nan bai biba na Rincon. Banda di bida di kunuku, bida komo piskadó i nabegante tambe tabata importante pa habitantenan di Rincon. Den e komunidat di Rincon te ku awor a warda mihó e kustumbernan relashoná ku bida di kunuku, di laman i dirigí pa spiritualidat. Pa hopi hende, ketu bai Rincon ta kuna di kultura di Boneiru ku fiestanan popular manera simadan, San Juan, San Pedro i Barí.