Kontenido di ‘patrimonio kultural’ a kambia bastante último dékadanan, parsialmente debí na instrumentonan ku UNESCO a desaroyá. Patrimonio kultural no ta limitá su mes na monumento i kolekshon di opheto. E ta inkluí tambe tradishonnan òf ekspreshonnan bibu heredá di nos antepasadonan i ku ta pasa pa nos desendientenan, manera tradishon oral, arte eséniko, práktika sosial, ritual, evento festivo, konosimentu i práktikanan relashoná ku naturalesa I universo, i konosimentu i téknika pa produsí artesania tradishonal.

Apesar ku e ta frágil, patrimonio kultural intangibel ta un faktor importante pa mantené diversidat kultural den e mundu aktual ku globalishon kresiente. Konosimentu di patrimonio kultural intangibel di diferente komunidat ta kontribuí na diálogo entre kultura i ta promové rèspèt pa otro manera di biba.

Importansia di patrimonio kultural intangibel no ta e manifestashon kultural riba su mes, sino e rikesa na konosementu i téknika ku ta pasa di generashon pa generashon. E balor sosial i ekonómiko di e pasamentu di konosementu akí ta relevante pa tantu gruponan minoritario komo esnan mayoritario den un Estado, i ta mes importante pa paisnan den desaroyo komo pa esnan desaroyá.

Patrimonio kultural intangibel ta:

• Tradishonal, kontemporáneo i bibu: patrimonio kultural intangibel no solamente ta inkluí tradishonnan heredá di pasado, sino tambe práktikanan kontemporaneo na kua diverso grupo kultural ta partisipá.

• Integradó: nos por kompartí ekspreshonnan di patrimonio kultural intangibel ku otro, ora esakinan ta parse otro. Sea nan ta di un bario bisiña, di un siudat na otro banda di mundu, òf ku emigrantenan a bin kuné. Tur ta forma parti di patrimonio kultural intangibel: a transmití nan di generashon pa generashon, nan a evolushoná ku tempu i ta kontribui na duna nos un sintimentu di identidat i kontinuidat, kreando un konekshon entre pasado i futuro a traves di presente. Patrimonio kultural intangibel no ta kontestá e pregunta si sierto práktika ta spesífiko di ún kultura. E ta kontribuí na koheshon sosial, fomentando un sintimentu di identidat i responsabilidat ku ta yuda hende sinti su mes parti di un òf vários komunidat i di sosiedat en general.

• Representativo: patrimonio kultural intangibel no ta simplemente un bien kultural, djis pa su eksklusividat òf balor eksepshonal. E ta floresé den komunidat I ta dependé di esnan ku nan konosimentu di tradishon, téknika i kustumber ta pasa pa sobrá di komunidat, di generashon pa generashon, òf pa otro komunidat.

• Basá den komunidat: un ekspreshon òf práktika solamente por ta patrimonio kultural intangibel si komunidatnan, gruponan òf individualnan ku ta krea, mantené i transmití esakinan ta rekonosé esakinan komo tal. Sin e rekonosimentu akí, ningun hende no por disidí pa nan ku un ekspreshon òf práktika ta nan patrimonio.