Boneiru, ku Kralendijk/Playa komo kapital, ta e isla mas pariba di Islanan Abou. E ta entre 68°11’ i 68°25’ L.W. i entre 12°2’ i 12°19’ L.N. E tin e forma paresido na un hak, di kua e parti hòl ta parti pabou. Su superfisie ta 288 km², hanchura ta varia entre 5 i 12 km, largura – midí di Malmok na nort te na e punta mas na sùit, ta mas o mènos 40 km. Pa loke ta trata forma i struktura, tin kontraste basta grandi entre e parti nort wèst ku seru, e parti mei mei ku terasa i e parti sùit ku ta hopi plat.

N’e parti nortwèst ta topa e serunan mas haltu di kua Brandaris ta esun mas haltu ku 240,8 m. Na haltura di Rincon, direpente e área ku seru ta pasa pa un área plat, na parti sùit e ta yega te na e rant di mas o ménos 100 m haltu di e terasa di piedra di kalki di e terasa mei mei di Boneiru. Den direkshon nort i pariba, e terasanan gradualmente ta baha na haltura.

Karakterístiko pa e parti akí di Boneiru ta e hopi barankanan haltu i gròt ku tin. E terasa haltu di mei mei di Boneiru ta finalisá den un rant stret di Kibrá di Montaña (138 m). Sùit di esaki, Boneiru ta bira mas plat i finalmente ta pasa na djis un tiki riba nivel di laman banda di e saliñanan sùit di Punt Vierkant.

Boneiru tin un kosta di koral elevá ku na parti nort i pariba ta mas haltu i mas brutu ku e parti sùit i pabou. Na vários lugá n’e parti nort i pariba, tin boka manera Boka Onima i Boka Washikemba. Aki i aya a forma playa di santu chikitu manera entre otro Playa Lechi n’e parti wèst. Na Boneiru tambe tin un sistema di vaye postglasial manera Schottegat na Kòrsou ku bon posibilidat di haf.
Na Boneiru sinembargo, pa motibu di formashon di koral, nan a sera kompletamente òf kasi parsialmente for di laman i a transformá den saliña. Entro otro Boka Bartol, Slagbaai i Gotomeer ta kai bou di esaki. Na parti sùit di Boneiru ta keda Pekelmeer ku un konekshon habrí ku laman. Esaki a resultá di gran importansia pa kosechá salu i komo lugá di brui pa flamingo. Algu mas na nort na e kosta ost, ta haña Lac, un lago ku ref di koral a sera parsialmente, aksesibel pa boto. Aki ta haña un kantidat grandi di karkó ku piskadónan a laga atras. Palu di mangel a krese i sera un parti grandi di e lago. Den esaki hopi bestia ta biba i pone webu. Un playa di santu relativamente hanchu ta forma e parti sùit di e lago.

N’e parti pabou di Boneiru riba un distansia di mas o ménos 2 km for di kosta di Boneiru ta keda Klein Bonaire ku un superfisie di mas o ménos 6 km².
Sirkunstansianan di klima semi-árido ta determiná e vegetashon natural di Boneiru, e kaida promedio di awaseru di 1905 t/ku 1980 ta 503,7 mm. E ta konsistí di prinsipalmente di mata ku òf sin sumpia, palu no haltu i mata di káktus. Den bahianan paden ta topa un vegetashon di palu di mangel i na kosta mata ku no ta krese bira haltu i ta bai bon ku awa salu. E sabananan ku ántes tabata asina importante, tin un karakter di temporada i prinsipalmente pa motibu di awa salu, a disparsé kasi kompletamente.

Fuentenan natural di awa dushi, ta haña na entre otro Dos Pos, Pos di Rincon, Fontein i tambe den e área di piedra di kalki parti sùit. Na vários sitio a purba oumentá reserva di awa ku kobamentu di pos i konstrukshon di dam na lugánan adekuá pa esei den roi, ku ta forma asina tanki i dam. E parti nort tin muchu mas mondi ku e parti sùit. Aki ta keda mayoria di e plantashi grandi manera Washington, Slagbaai, Fontein, Bolivia, Colombia.

E mondinan akí ta solamente un parti chikitu di loke a sobra di mondinan muchu mas grandi i será di ántes. For di binimentu di spañónan na 1499 te na prinsipio di siglo 20, na eskala grandi a kap brasia i wayaká. Kimamentu di karbon pa eksportá pa Kòrsou i krio di kabritu a hasi hopi daño na kresementu di palu.

Den kuadro di protekshon di naturalesa, pa hopi aña kaba Boneiru ta internashonalmente konosí pa e indikashon, organisashon i maneho di áreanan protehá ku ta kai bou di Parke Nashonal Washington Slagbaai i Parke Marino Nashonal Boneiru. Stichting Nationale Parken Bonaire (Stinapa) a kuminsá na 1969 ku Parke Washington, ku a ekspandé na 1979 ku kompra di Slagbaai. E parke marino a kuminsá na 1979. Meta di tur dos parke ta pa protehá i mantené naturalesa pa desendensia.

Riba 21 di novèmber 2001 Konseho Insular di Boneiru ta aprobá e plan di desaroyo pa Klein Bonaire. E isla, designa komo área protehá, ta bira parti di Parke Nashonal Marino di Boneiru i manehá pa STINAPA Bonaire manera deskribí den e Ordenansa di Medio Ambiente Marítimo (2001).

Link to STINAPA (na inglés):
https://stinapabonaire.org/bonaire-national-marine-park/klein-bonaire/

Video Klein Bonaire (Mayoria na Papiamentu):