Un tradishon hopi konosí ántes na Boneiru tabata boutismo di pòpchi. Ora ku un mucha haña un pòpchi nobo, tabata batisá esaki den un forma úniko. Tabatin un madrina, padrinu, yaya i asta un persona bistí na pastor ku tabata batisá e pòpchi den nòmber di angua, feneta, hilu, vingerhoed etc. Meskos ku kualké fiesta, tabata kontratá un persona pa hiba e invitashon na boka na esnan skohé pa bini e fiesta. E hende muhé ku ta hiba e invitashon yamá ‘makubeken’.
Mayoria pòpchi di ántes tabata kreá pa mucha mes. Hopi hende tabata pober i no por a kumpra un pòpchi importá pa nan yunan. E muchanan tabata traha pòpchi ku kabuya i bòter òf di paña.