Un aktividat hopi konosí ántes tabata kimamentu di kalki. Tabata usa kalki den konstrukshon, pero tambe pa otro meta manera kurtimentu di kueru i asta den drechamentu di morto.

E promé kos ku mester a hasi ora di traha un fòrnu di kalki, tabata harka e sitio kaminda tabata bai traha esaki. Despues ta prepará un mecha trahá di flambeu i material di kas di komehein. Ora ta kla, ta bai mondi pa kòrta palu. E tipo di palunan mas usá pa un fòrnu di kalki ta palu di Boneiru, palu di sia, palu di kuida i tronkon di yatu hechu.

Despues ta stiwa, parti abou, e palunan rònt di e mecha. Mester kuña e palunan bon pa airu no pasa. E fòrnu su forma ta meskos ku un kas di araña, i ora e kaba kima, meskos ku un flor.

Seguidamente ta stiwa piedra riba e palunan. Mester wak bon kon ta stiwa e piedranan. Si pone piedra di mas, e kandela no tin forsa.

Tin dos sorto di piedra ku no ta bon pa traha fòrnu di kalki: piedra muhé, komo ku e ta moli di mas; piedra hòmber ta duru di mas. Loke nan ta yama krastèn ta e mihó piedra pa traha kalki kuné.

Ora a hasi tur e kosnan aki, ta kla pa pega e fòrnu na kandela. Pero promé mester traha un ramada di palu di maishi òf foyo di wayaká òf oliba pa bientu no ta muchu fuerte rònt di e fòrnu. Ta pega e fòrnu na e mecha, pues meimei ariba. E kandela ta sigui kana bai abou.

Tabata sende e fòrnu di kalki atardi i lag'é kima henter anochi. Esaki pa evitá ku hende ta mira e fòrnu i pashumá esaki. Tabata estriktamente prohibí pa hende muhé na estado pasa banda di un fòrnu di kalki. Esaki tambe tabata pashumá e kalki.

Por lesa mas den Boneiru di Antaño II p.39 di B. Antoin riba archivoboneiru.com